"सम्माननीय प्रधानमन्त्री सुशीला कार्कीज्यूको प्रमुख आतिथ्यतामा प्रहरी निरीक्षक आधारभूत तालिमको दीक्षान्त समारोह सम्पन्न"
२०८२-१०-१९
- A
- A-
- A+
राष्ट्रिय प्रहरी प्रशिक्षण प्रतिष्ठानमा सञ्चालित प्रहरी निरीक्षक आधारभूत तालिम १-१८३ औं समूह (PGDPS 14th) समूहको आज मिति २०८२ माघ १९ गते सम्माननीय प्रधानमन्त्री सुशीला कार्कीज्यूको प्रमुख आतिथ्यतामा विशेष समारोहबीच दीक्षान्त समारोह सम्पन्न भयो ।
समारोहमा प्रमुख अतिथि सम्माननीय प्रधानमन्त्री सुशीला कार्कीज्यूले उत्कृष्ट प्रशिक्षार्थी प्रहरी निरीक्षकज्यूहरुलाई पुरस्कार वितरण गरी दीक्षित अधिकृतहरुलाई हार्दिक बधाई तथा व्यावसायिक सफलताको शुभकामना व्यक्त गर्नुका साथै परम्परागत अपराध सहित साइबर अपराध, संगठित अपराध, वित्तीय अपराध, बहुदेशीय अपराध र सामाजिक द्वन्दका नयाँ आयामहरू देखा परिरहेका वर्तमान अवस्थामा प्रहरीको भूमिका केवल आदेश पालनामा मात्रै सिमित नरही एक विश्लेषक र समाधानकर्ताको रूपमा विकसित हुनुपर्नेमा उहाँले जोड दिनुभयो । निष्पक्ष र विश्वसनीय वातावरणमा निर्वाचन सुनिश्चित गर्नु राज्यको दायित्व भएको र यस दायित्वमा नेपाल प्रहरीको भूमिका अत्यन्त संवेदनशील रहने उल्लेख गर्दै कुनै राजनीतिक प्रभाव, पूर्वाग्रहबाट माथि उठेर कानूनको मर्म अनुसार सबै प्रहरी कर्मचारीहरूले आफ्नो जिम्मेवारी निर्वाह गर्न निर्देशन गर्नुभएको थियो ।
सोही समारोहमा माननीय गृहमन्त्री ओमप्रकाश अर्यालज्यूले दीक्षित प्रहरी अधिकृतहरू केवल निलो बर्दीधारी मात्र नभई राज्यको प्रतिनिधि, कानूनको संरक्षक र जनविश्वासका वाहक भएको तथ्य प्रकाश पार्दै सोही वमोजिमको कार्य गर्न निर्देशन दिनुभएको थियो ।
उक्त समारोहमा प्रहरी महानिरीक्षक दान बहादुर कार्कीज्यूले धन्यवाद ज्ञापन गर्नुहुँदै आज दीक्षित हुनुभएका प्रहरी निरीक्षकहरूलाई बधाई दिँदै पवित्र गरिमामय र नागरिक सेवामा समर्पित नेपाल प्रहरी संगठनमा स्वागत गर्नुभई राष्ट्र र नागरिक सेवालाई जीवनको लक्ष्य ठानी बफादार र सच्चा प्रहरीको रुपमा आफूलाई चिनाउन प्रहरी अधिकृतहरु सफल हुने विश्वास समेत व्यक्त गर्नुभयो । प्रतिष्ठानका कार्यकारी निर्देशक प्रहरी अतिरिक्त महानिरीक्षक शिद्धी बिक्रम शाहज्यूले शब्दोच्चारणद्वारा प्रशिक्षार्थीहरुलाई सपथ ग्रहण गराउनुका साथै स्वागत मन्तव्य एवम् तालिम सम्बन्धी प्रतिवेदन प्रस्तुत गर्नुभएको थियो । उक्त कार्यक्रममा प्रहरी निरीक्षक आधारभूत तालिम १-१८३ औं समूहका प्रशिक्षार्थी प्रहरी निरीक्षकहरू द्वारा कवाज प्रर्दशन तथा नेपाल प्रहरी संगित विद्यालय द्वारा सांगीतिक धुन प्रस्तुत गर्नुभएको थियो ।
मिति २०८१ साउन २१ गते बाट प्रारम्भ भएको प्रहरी निरीक्षक आधारभूत तालिम १-१८३ औं समूहमा ९ जना महिला र ८३ जना पुरूष गरी कुल ९२ जना सम्मिलित तालिमको सर्वप्रथम एवम् शारीरिक क्षमता तथा आत्मबल अभिवृद्धि प्रथम प्रशिक्षार्थी प्रहरी निरीक्षक निराजन बस्नेत, सर्वद्वितीय प्रशिक्षार्थी प्रहरी निरीक्षक मोहनसिंह बस्नेत, सर्वतृतीय प्रशिक्षार्थी प्रहरी निरीक्षक तारा बहादुर तामाङ, अध्ययन प्रथम प्रशिक्षार्थी प्रहरी निरीक्षक नविन कुमार शाही, कवाज प्रथम प्रशिक्षार्थी प्रहरी निरीक्षक ईश्वर महत, मस्केट्री तथा चाँदमारी प्रथम प्रशिक्षार्थी प्रहरी निरीक्षक श्रीमान चाई तथा प्रहरी युक्ति तथा कारवाही प्रथम प्रशिक्षार्थी प्रहरी निरीक्षक दिनेश प्रसाद रिमालज्यू पुरस्कृत हुनुभएको थियो ।
दीक्षान्त समारोहमा श्रम, रोजगार तथा सामाजिक सुरक्षा मन्त्री एवम् अवकाश प्राप्त प्रहरी अतिरिक्त महानिरीक्षक राजेन्द्र सिंह भण्डारी, सम्माननीय प्रधानमन्त्रीज्यूका मुख्य सल्लाहकार, प्रधानमन्त्रीज्यूका प्रेस सल्लाहकार, महान्यायाधिवक्ता, नेपाल सरकारका मुख्य सचिव, प्रधानसेनापति, गृह सचिव, सशस्त्र प्रहरी महानिरीक्षक, राष्ट्रिय अनुसन्धान विभागका मुख्य अनुसन्धान निर्देशक, पूर्व प्रहरी महानिरीक्षकहरू, प्रतिष्ठानका पूर्व कार्यकारी निर्देशक तथा समादेशकहरू, प्रहरी अतिरिक्त महानिरीक्षकहरू, प्रहरी नायव महानिरीक्षकहरू, नेपाली सेना, नेपाल प्रहरी तथा सशस्त्र प्रहरी बल नेपालका वरिष्ठ अधिकृतहरू, संचारकर्मीहरू, प्रशिक्षार्थीहरूका अभिभावकहरू तथा अन्य आमन्त्रित महानुभावहरूको उपस्थिति रहेको थियो ।